3 ਸਾਲਾ ਮਾਸੂਮ ਬੱਚੇ ਦੇ ਉੱਪਰੋਂ ਲੰਘ ਗਈ ਸਕੂਲ ਬੱਸ, ਦਾਦੀ-ਭੈਣ ਦੇ ਸਾਹਮਣੇ ਤੜਫ਼-ਤੜਫ਼ ਕੇ ਹੋਈ ਮੌਤ

3 ਸਾਲਾ ਮਾਸੂਮ ਬੱਚੇ ਦੇ ਉੱਪਰੋਂ ਲੰਘ ਗਈ ਸਕੂਲ ਬੱਸ, ਦਾਦੀ-ਭੈਣ ਦੇ ਸਾਹਮਣੇ ਤੜਫ਼-ਤੜਫ਼ ਕੇ ਹੋਈ ਮੌਤ

( KOROTANY ) ਮੇਰਠ: ਉੱਤਰ ਪ੍ਰਦੇਸ਼ ਦੇ ਮੇਰਠ ਵਿੱਚ ਵੀਰਵਾਰ ਸਵੇਰੇ ਇੱਕ ਦਰਦਨਾਕ ਸੜਕ ਹਾਦਸੇ ਵਿੱਚ 3 ਸਾਲਾ ਮਾਸੂਮ ਦੀ ਸਕੂਲ ਬੱਸ ਹੇਠਾਂ ਆਉਣ ਕਾਰਨ ਮੌਤ ਹੋ ਗਈ। ਹਾਦਸਾ ਸਵੇਰੇ ਕਰੀਬ 8 ਵਜੇ ਮਵਾਨਾ ਦੇ ਪਰਿਕਸ਼ਿਤਗੜ੍ਹ ਥਾਣਾ ਖੇਤਰ ਵਿੱਚ ਵਾਪਰਿਆ। ਹਾਦਸੇ ਦੀ CCTV ਫੁਟੇਜ ਵੀ ਸਾਹਮਣੇ ਆਈ ਹੈ। ਜਾਣਕਾਰੀ ਮੁਤਾਬਕ ਵਧਲਾ ਪਿੰਡ ਦਾ ਰਹਿਣ ਵਾਲਾ ਪ੍ਰਿੰਸ ਚੌਧਰੀ ਕਿਸਾਨ ਹੈ।

ਉਸ ਦੇ ਦੋ ਬੱਚੇ ਹਨ-6 ਸਾਲਾ ਧੀ ਜਸਵੀਰ ਅਤੇ 3 ਸਾਲਾ ਪੁੱਤਰ ਨਵਨੀਤ। ਜਸਵੀਰ ਭਾਵਨਾ ਇੰਟਰਨੈਸ਼ਨਲ ਸਕੂਲ ਵਿੱਚ LKG ਦੀ ਵਿਦਿਆਰਥਣ ਹੈ ਅਤੇ ਸਕੂਲ ਬੱਸ ਰੋਜ਼ਾਨਾ ਉਸ ਨੂੰ ਲੈਣ ਪਿੰਡ ਆਉਂਦੀ ਹੈ।

ਦਾਦੀ ਨਾਲ ਭੈਣ ਨੂੰ ਬੱਸ ‘ਚ ਬਿਠਾਉਣ ਗਿਆ ਸੀ ਨਵਨੀਤ
ਵੀਰਵਾਰ ਸਵੇਰੇ ਕਰੀਬ 8 ਵਜੇ ਨਵਨੀਤ ਆਪਣੀ ਦਾਦੀ ਉਰਮਿਲਾ ਦੇਵੀ ਨਾਲ ਵੱਡੀ ਭੈਣ ਜਸਵੀਰ ਨੂੰ ਸਕੂਲ ਬੱਸ ਵਿੱਚ ਬਿਠਾਉਣ ਲਈ ਪਿੰਡ ਤੋਂ ਬਾਹਰ ਸੜਕ ‘ਤੇ ਗਿਆ ਸੀ। ਦਾਦੀ ਨੇ ਨਵਨੀਤ ਨੂੰ ਸੜਕ ਦੇ ਕਿਨਾਰੇ ਖੜ੍ਹਾ ਕੀਤਾ ਅਤੇ ਜਸਵੀਰ ਨੂੰ ਬੱਸ ਵਿੱਚ ਬਿਠਾਉਣ ਚਲੀ ਗਈ। ਜਿਵੇਂ ਹੀ ਜਸਵੀਰ ਬੱਸ ਵਿੱਚ ਬੈਠੀ, ਡਰਾਈਵਰ ਨੇ ਬੱਸ ਚਲਾ ਦਿੱਤੀ। ਇਸ ਦੌਰਾਨ ਨਵਨੀਤ ਵੀ ਬੱਸ ਦੇ ਪਿੱਛੇ ਚੱਲ ਪਿਆ ਅਤੇ ਅਚਾਨਕ ਬੱਸ ਦੇ ਅਗਲੇ ਪਹੀਏ ਦੀ ਲਪੇਟ ਵਿੱਚ ਆ ਗਿਆ। ਲੋਕਾਂ ਨੇ ਰੌਲਾ ਪਾ ਕੇ ਡਰਾਈਵਰ ਨੂੰ ਬੱਸ ਰੋਕਣ ਲਈ ਕਿਹਾ, ਪਰ ਉਦੋਂ ਤੱਕ ਬੱਚਾ ਬੱਸ ਦੇ ਹੇਠਾਂ ਆ ਚੁੱਕਾ ਸੀ। ਲੋਕ ਤੁਰੰਤ ਬੱਚੇ ਨੂੰ ਹਸਪਤਾਲ ਲੈ ਕੇ ਗਏ, ਜਿੱਥੇ ਡਾਕਟਰਾਂ ਨੇ ਉਸ ਨੂੰ ਮ੍ਰਿਤਕ ਐਲਾਨ ਦਿੱਤਾ।

ਪਰਿਵਾਰ ਨੇ ਥਾਣੇ ਸਾਹਮਣੇ ਲਾਇਆ ਧਰਨਾ
ਹਾਦਸੇ ਦੀ ਖ਼ਬਰ ਮਿਲਦੇ ਹੀ ਪਰਿਵਾਰਕ ਮੈਂਬਰ ਅਤੇ ਪਿੰਡ ਵਾਸੀ ਹਸਪਤਾਲ ਪਹੁੰਚ ਗਏ। ਬਾਅਦ ਵਿੱਚ ਪਰਿਵਾਰ ਬੱਚੇ ਦੀ ਲਾਸ਼ ਲੈ ਕੇ ਪਰਿਕਸ਼ਿਤਗੜ੍ਹ ਥਾਣੇ ਪਹੁੰਚਿਆ ਅਤੇ ਕਾਰਵਾਈ ਦੀ ਮੰਗ ਕੀਤੀ। ਪਰਿਵਾਰ ਦਾ ਦੋਸ਼ ਹੈ ਕਿ ਪੁਲਿਸ ਨੇ ਕਰੀਬ 2 ਘੰਟਿਆਂ ਤੱਕ ਕੋਈ ਕਾਰਵਾਈ ਨਹੀਂ ਕੀਤੀ। ਇਸ ਤੋਂ ਨਾਰਾਜ਼ ਲੋਕਾਂ ਨੇ ਥਾਣੇ ਦੇ ਸਾਹਮਣੇ ਬੱਚੇ ਦੀ ਲਾਸ਼ ਰੱਖ ਕੇ ਸੜਕ ਜਾਮ ਕਰ ਦਿੱਤੀ। ਸੂਚਨਾ ਮਿਲਣ ‘ਤੇ ਪੁਲਿਸ ਅਤੇ ਪ੍ਰਸ਼ਾਸਨਿਕ ਅਧਿਕਾਰੀ ਮੌਕੇ ‘ਤੇ ਪਹੁੰਚੇ ਅਤੇ ਪਰਿਵਾਰ ਨੂੰ ਕਾਰਵਾਈ ਦਾ ਭਰੋਸਾ ਦਿੱਤਾ। ਇਸ ਤੋਂ ਬਾਅਦ ਲੋਕਾਂ ਨੇ ਜਾਮ ਖੋਲ੍ਹ ਦਿੱਤਾ।

ਬੱਸ ਕਬਜ਼ੇ ‘ਚ, ਡਰਾਈਵਰ ਖ਼ਿਲਾਫ਼ ਕੇਸ
ਥਾਣਾ ਇੰਚਾਰਜ ਕੇਦਾਰ ਨਾਥ ਸਿੰਘ ਨੇ ਦੱਸਿਆ ਕਿ ਬੱਚੇ ਦਾ ਪੰਚਨਾਮਾ ਭਰਿਆ ਗਿਆ ਹੈ। ਪਰਿਵਾਰ ਨੇ ਪੋਸਟਮਾਰਟਮ ਕਰਵਾਉਣ ਤੋਂ ਇਨਕਾਰ ਕੀਤਾ ਹੈ। ਪੁਲਿਸ ਨੇ ਸਕੂਲ ਬੱਸ ਨੂੰ ਕਬਜ਼ੇ ਵਿੱਚ ਲੈ ਲਿਆ ਹੈ। ਬੱਚੇ ਦੇ ਪਿਤਾ ਪ੍ਰਿੰਸ ਦੀ ਸ਼ਿਕਾਇਤ ‘ਤੇ ਵਾਹਨ ਨੰਬਰ UP15 JT 9333 ਦੇ ਆਧਾਰ ‘ਤੇ ਅਣਪਛਾਤੇ ਡਰਾਈਵਰ ਖ਼ਿਲਾਫ਼ ਮਾਮਲਾ ਦਰਜ ਕਰ ਲਿਆ ਗਿਆ ਹੈ। ਪੁਲਿਸ ਵੱਲੋਂ ਹਾਦਸੇ ਦੀ ਜਾਂਚ ਕੀਤੀ ਜਾ ਰਹੀ ਹੈ।